HOME | DD
BrokenraZr — Rehaai
#birth #care #freedom #mother #poem #sher #slain #urdu #atmospheric #fallenangel #originalart #poetry #theend
Published: 2022-11-28 12:11:40 +0000 UTC; Views: 3417; Favourites: 7; Downloads: 1
Redirect to original
Description
Tumhari qabr par
main fatiha padhne nahin aayi
mujhe malum tha
tum mar nahin sakte
tumhari maut ki sachchi khabar jis ne udaai thi..
vo jhuta tha.
Vo tum kab thhe.
Meri ankhen
tumhare manzaron men qaid hain ab tak.
Main jo bhi dekhti hoon
sochti hoon... vo vahi hai
jo tumhari nek-nami aur bad-nami ki duniya thi.
Kahin kuchh bhi nahin badla.
Tumhare haath meri ungliyon men saans lete hain..
Main likhne ke liye jab bhi qalam kaghaz uthaati hoon
tumhen baitha hua main apni hi kursi men paati hoon.
Badan mein mere jitna bhi lahu hai..
vo tumhari laghzishon nakamiyon ke saath behta hai.
Meri avaz men chhup kar
tumhara hi zehn rahta hai
Meri bimariyon mein tum..
Meri lachariyon mein tum..
Tumhari qabr par jis ne tumhara naam likha hai
vo jhuta hai..
tumhari qabr mein main dafn hoon.
Tum mujh mein zinda ho.
Kabhi fursat mile.. to fatiha padhne chale aana.
--
